ஒரு புல்லைக்கூட மனிதனால் படைக்கமுடியாது

மண் நீரூட்டும்
விதை கன்றாகும்
கன்று செடியாகி பூ பூக்கும்
வண்ணப்பூச்சி முத்தமிட
மலர் காயாகும்
காற்றால் கதிரால் முகிலால்
காய் கனியாகும்
பழம் பறவைக்கும்
விதை மண்ணுக்குமாகி
செடியும் மரமும் புதிதாய் பிறக்கும்.
விந்தணுவை கருமுட்டையை
சோதனைக்குழாயில்
குளிர்பதனப்பெட்டியில்
சேர்ந்திருக்கச் செய்யலாம்.
ஒட்டமுடியாதெங்களால்.
விந்தணு கருமுட்டையின்
விளிம்பைத் தானாய் பிளந்து கலவாமல்
விளையாதுயிரென்று கைவிரிக்கிறார் மருத்துவர்.
தன்னிச்சையாய் இயங்கும் படைப்பின் நுணுக்கம்
சோதனைக்குழாயில் அடைபடவில்லை.
..............................................................................
நினைத்துக்கொள்கிறேன்.
ஒரு புல்லைக்கூட மனிதனால் படைக்கமுடியாது