திரும்பிப் பார்

அரும்பிய புனிதவாழ்வை
கரும்புச்சாறு, கற்கண்டு இனிப்பாய்
விரும்பிய வகையில் வாழ, நன்கு
திரும்பிப் பார்த்து வாழ்ந்திடுவாய்!

மதுவருந்தி மாதோடலைவதும்
மாயையினால் மானமிழப்பதுவும் வீண்!
மாண்புடையோர் நல் வாழ்வை
மாதிரியாய்த் திரும்பிப் பார்!
தளர்ந்தோர் நிலையைத் திரும்பிப் பார்!
தவறுகளைத் திருத்திடத் திரும்பிப் பார்!
தருமம் செய்ய விரும்பிப் பார்!
தன்னம்பிக்கைச் சிகரத்தில் ஏறிப்பார்!
திராணி பெற்றிட முன்னைய
தித்திக்கும் சாதனைகளையும் என்றும்
திரும்பிப் பார்! மனத்திண்மை சேரும்.
திடகாத்திரமாக முன்னேறி உயர்வாய்!
பெற்றோருக்குக் கடமை புரிந்திட
பெறுமான வாழ்வு வாழ்ந்திட
பெயரினை உலகில் பொறித்திட
பொறுப்பின்றிப் போகாமற் திரும்பிப் பார்!